Hindi Sapat

Sa tuwing naririnig ko ang chorus ng kantang ito, hindi ko maiwasan magmukmok ako sa isang tabi at naaalala ko na ako'y musmos pa din na hinihintay ang mga yakap mo. It goes like this...

Nanay, mami, ina
Mama, inang, mamang, ima
Sa’min ay wala ng iba ‘di sapat ang salamat inay

Nanay, mami, ina
Mama, inang, mamang, ima
Dapat n’yong malaman isisigaw na ikaw ang aking inay

Gigising nang madaling araw, pagiinit ako nang tubig panligo, nakahanda na nang masarap na almusal, pagdadalhan nang baon pang eskwela.

Madaming bayarin, pangkuryente, tubig, tuition fees, at iba pa. Pero may pangkain pa din nakahain sa lamesa natin.

Nakipagkwentuhan sa amin na tinuring kaming kaibigan, umiyak sa aming mga kapasawayan na ginawa bilang anak.

Tuwing kami ang may sakit, ikaw ang nag alaga ngunit nung ikaw na ang may sakit, hindi ka man lang humingi nang tulong para maihagkan ka namin.

Kahit ngayon na nakalatay ka nalang sa iyong higaan, alam ko lumalaban ka pa din para sa amin.

Iniikot-ikot kita sa iyong magandang upuan na nagsisilbing trono mo habang tayo ay nagkwekwentuhan. Ito na yata ang huli nating oras nang malakas ka pa at nakakausap.

Hindi ko nga alam ma... kung tinuturuan mo ako ngayong ganito ka na... mahirap pala maging isang katulad mo. Masakit pero masarap ang may responsibilidad para sa pamilya mo. Masakit kasi ako na ang gumagawa nang desisyon para sa pamilya at para sa iyo.

Masakit na nakikita kita nanghihina araw-araw, oras-oras... masakit na nagdesisyon kami para iuwi ka na. Masakit na nakapikit ka na lang. 

Alam kong hindi sapat ang salamat inay, mama sa lahat nang tinuro mo sa akin, ala-ala na hindi masusuklian nang sino pa man. Ikaw ang pinakakamahal kong inay at kaibigan.

Kung papapiliin nga lang ako sino ang magiging nanay ko. Ikaw pa din ang pipiliin ko.

Namimiss ko na ang masasarap na luto mo, mga kwento mong paulit-ulit. Namimiss na kita.

Alam ko na handa na ako, kami, na sasama ka na sa Kanya pero hindi ko pa din maiwasan na ako'y mapaluha. 

Ma, Ako'y musmos pa din na bata na handang maghintay sa pagmamahal mo.